(1915-?)

Амалия Майер 1915 жылы 30 қарашада Сталинград облысы Фролов ауданы Фриковск хуторында дүниеге келген. Ұлы Отан соғысы басталған 1941 жылы неміс ұлтын еріксіз Қазақстанға қоныс аударту басталды. Тағдыр тауқыметін тартқан Майерлер отбасы 1941 жылдың қыркүйек айында Шығыс Қазақстан облысы Большенарым ауданы Мало-Красноярка селосына қоныс аударады. Келе сала неміс отбасы ретінде есепке тіркеліп, әкімшілік қадағалауында болды.

Амалия Майер 1943 жылдың 10 қарашасында еңбек армиясына алынып, Свердловск облысы Карпинск ауданындағы Ресей немістеріне арналған Богословлаг (Богослов түзету-еңбек лагері) жіберілді. Лагерде оларды тұтқындар есебінде ұстаған. 16 барак, әр баракта 25 бөлме, әр бөлмеде үш қатарлы ағаш нарда 18 адамнан жатты. Лагерь аумағы тікенек сыммен қоршалып, төрт бұрышына төрт биік қарауыл қойылып, қарулы солдаттармен күзетілді. Лагерде 7000-нан астам 14 пен 65 жас аралығындағы адамдар болды.

1954 жылдың 1 қаңтарында кенттің 1-2 зонасында 400 адам тұрған. Карпинск ауданындағы арнайы қоныстандырылған немістер саны 5298-ге жетті. 1941 жылдың қазан айында Украинадағы Сталино қаласынан ВЛКСМ-ның 15 жылдығы, Сталин атындағы Мемлекеттік машина құрастыру зауыты Карпинскіге эвакуацияланды. Құрал–жабдық пен жұмысшыларды тиеген алғашқы эшалон Карпинскіге 1941 жылдың қараша айында, желтоқсан айында тағы екі эшалон келді. Әскери өнімдер шығарып жатқан зауыт «Карпинск машина жасау зауыты» деген атау алды. 1941-1945 жылдары «Боголовскуголь» тресінде өткен 30 жылда өндірілген көмірден 1,5 есе көп көмір (17,7 млн. тонна) өндірілген.

Амалия Майер 1956 жылы 18 қаңтарда КСРО ІІМ 1955 жылғы 16 желтоқсандағы 0601 бұйрығы бойынша әкімшілік қадағалаудан босатылады.

Амалия Егоровна өмірінің соңғы жылдарын Германияның Гамбург қаласында өткізді.